Skip to main content

பாரெல்லாம் பைந்தமிழ்!

பாரெல்லாம் பரவி இருந்த என் பைந்தமிழ் இன்று பள்ளிக் கூடங்களில் மறுக்கப் படுகின்றதே? தரணி எல்லாம் தவழ்ந்து வந்த என் தீந்தமிழை இன்றைய மழலையர் கற்க முடியாதபடி தனியார் பள்ளிகள் ஆங்கில கல்வி புகட்டுகின்றனவே? உலகெல்லாம் ஓங்கி ஒலித்த என் தமிழை ஒழித்துக் கட்ட தமிழின துரோகிகள் முனைந்து விட்டனரே? இதை தடுப்பவர் யார்?

திரண்டு வாருங்கள் தமிழர்களே! அழிகின்ற தமிழை காக்கும் பொறுப்பு உங்களிடம்தான் இருக்கிறது! பல்லாயிரம் ஆண்டு காலம் வாழ்ந்த நம் தமிழ் நாம் வாழ்ந்த காலத்தில் அழிந்தது என்று சரித்திரம் சொல்லக் கூடாது. தாய்மொழியை உதறுபவன் தன தாயை இகழ்ந்ததற்கு சமம். தமிழ் வழிக் கல்வியை தடுப்பவனை தாய் தடுத்தாலும் விடேன்.

இப்படியெல்லாம் சரளமாக எழுதிக் கொண்டிருந்த கவிக் கோவின் கண் முன்னே ஏராளமான கைத்தட்டுக்களும் பாராட்டுக்களும் விரிந்தன. தமிழ் குடிதாங்கி, தமிழின காவலர், தமிழ் செம்மல் என்றெல்லாம் ஏராளமான பட்டங்களை ஏற்கனவே சுமக்க முடியாமல் சுமந்து கொண்டிருக்கும் தான் வருங்காலத்தில் இன்னும் என்னவெல்லாம் பட்டங்கள் சுமக்க வேண்டுமோ என்ற ஒருவித சந்தோச பயம் கூட அவருக்கு வந்தது.

இந்த போராட்டத்தை எதிர்த்து சில தமிழின துரோகிகளும், மாற்று மொழி தாசர்களும் நீதிமன்றத்திற்கு போகலாம். அந்நிய மொழியை குழந்தைகளுக்கு புகட்டுவதை அடிப்படை உரிமை என்றும் கூட கூறலாம். தடைகளை முறியடித்து தமிழ் கல்வி பற்றிய விழிப்புணர்வை எப்படி மக்களிடம் பரப்பலாம் என்று ஆழமான சிந்தனையில் மூழ்கி இருந்தவரை ஒரு குரல் தட்டி எழுப்பியது.

"ஹை டாடி! ஐ யாம் லீவிங் பார் அமேரிக்கா! சீ யு சூன்! "

சொன்னது வெறும் யாருமல்ல அமெரிக்காவில் ஐ.டி பிசினெஸ் பண்ணும் அவர் ஆசை மகன்தான்!

"ஓகே மை டியர் சன்! டேக் கேர்! கால் மீ லேட்டர்! "

பதில் அளித்த அவர் மீண்டும் எப்படி தமிழ் வழிக் கல்வி பற்றிய பற்றிய விழிப்புணர்வை மக்களிடம் பரப்புவது என்ற சிந்தனையில் மூழ்கி விட்டார்.

வாழ்க தமிழ்! வெல்க தமிழர்!

நன்றி.

Comments

கும்பானி பிரதர்ஸ் கதை மாதிரி இதுவும் ஒரு பிரபல புள்ளியோட கதையா!?
Maximum India said…
ஒரு புள்ளியோட கதை மட்டுமல்ல! இன்றைய பல புள்ளிகளோட கதை இது.
மிக பயனுள்ள விஷயத்தை எடுத்துக் கொண்டு பின்னூட்டம் போட வாய்ப்பு அளித்தமைக்கு நன்றி.

நாங்கள் படித்தபோது, (நானும் அறுபதை எட்டிக்கொண்டு இருப்பதால் " அந்தக் காலத்தில்..." என்று பேசத் துவங்கி விட்டேனோ தெரியவில்லை.)

95% ( இன்னும் அதிக மாக இருக்கலாம்) ஆரம்பக் கல்விக் கூடங்களில் தமிழே பயிற்று மொழியாக இருந்தது. 90-95% உயர் நிலைப் பள்ளிகளிலே தமிழே பயிற்று மொழி.
Pre-University இல தான் 90% ஆங்கிலம் பயிற்று மொழி..

என் சொந்த அனுபவத்தில் , சமூக இயல், சரித்திரம், தோட்ட வேலை, முதலியவை தாய் மொழியில் தான் இருக்க வேண்டும். அப்போது தான் குழந்தைகள் தன வீடு, சுற்றார், தெரு, ஊர், மாவட்டம், மாநிலம் பற்றிய அறிவும் எண்ணங்களும் வளரும். பிற காலத்தில் பல சூழ் நிலைகளில் இந்த அறிவும் அனுபவமும் மிக அவசியம்.

இதைப் பற்றி நிறைய எழுதலாம். தனியே பதிவு போட வேண்டும்; (யாரும் படிக்க மாட்டார்கள். என்பது வேறு)

ஆனால் ஒன்று::: இந்த விவாதங்கள் தாய் மொழி பயிற்றுவிக்கும் இடத்தில் வாழ கொடுத்து வைத்தவர்கள் மட்டுமே பயன் பெறுபவை. உங்களுக்கும் (மும்பையில் மகளை ஆரம்பக் கல்வி படிக்க வைக்க வேண்டிய நிலை) எனக்கும் ( அப்போது டில்லியில்) விவாதங்களுக்கான விஷயங்கள் மட்டுமே
Anonymous said…
என் கதை.
Thomas Ruban said…
//"ஓகே மை டியர் சன்! டேக் கேர்! கால் மீ லேட்டர்! "

பதில் அளித்த அவர் மீண்டும் எப்படி தமிழ் வழிக் கல்வி பற்றிய பற்றிய விழிப்புணர்வை மக்களிடம் பரப்புவது என்ற சிந்தனையில் மூழ்கி விட்டார்.//

உள் ஒன்று வைத்து புறம் ஒன்று பேசும் பல தமிழக அரசியல் தலைவர்களுக்கு இது ஒரு "நச்"
பதிவு.

நன்றி அய்யா.
KARTHIK said…
நாம எதுவும் செயமுடியாதுங்க
காலம் தான் பதில் சொல்லனும்
Maximum India said…
//மிக பயனுள்ள விஷயத்தை எடுத்துக் கொண்டு பின்னூட்டம் போட வாய்ப்பு அளித்தமைக்கு நன்றி.//

உங்கள் பின்னூட்டத்திற்கு நான்தான் நன்றி சொல்லவேண்டும் நெற்குப்பை தும்பி ஐயா!

//95% ( இன்னும் அதிக மாக இருக்கலாம்) ஆரம்பக் கல்விக் கூடங்களில் தமிழே பயிற்று மொழியாக இருந்தது. 90-95% உயர் நிலைப் பள்ளிகளிலே தமிழே பயிற்று மொழி.
Pre-University இல தான் 90% ஆங்கிலம் பயிற்று மொழி.. //

உங்கள் காலகட்டத்தில் ஆங்கிலம் தாமதமாக அறிமுகப் படுத்தப் பட்டிருந்தாலும், ஆங்கில பயிற்சியின் தரம் மிகவும் அதிகமாக இருந்தது. ஆங்கிலேயரிடம் படித்தவர்களிடம் நீங்கள் படித்தீர்கள். இப்போது, மழலையர் பள்ளியிலேயே ஆங்கிலப் பாடம் அறிமுகப் படுத்தப் பட்டாலும் அதன் தரம் குறைவாகவே உள்ளது.

//என் சொந்த அனுபவத்தில் , சமூக இயல், சரித்திரம், தோட்ட வேலை, முதலியவை தாய் மொழியில் தான் இருக்க வேண்டும். அப்போது தான் குழந்தைகள் தன வீடு, சுற்றார், தெரு, ஊர், மாவட்டம், மாநிலம் பற்றிய அறிவும் எண்ணங்களும் வளரும். பிற காலத்தில் பல சூழ் நிலைகளில் இந்த அறிவும் அனுபவமும் மிக அவசியம். //

நிச்சயமாக. தாய்மொழி வழி கல்வி என்பது ஒருவரது சிந்தனைகளை தெளிவாக்க உதவும் என்பதில் சந்தேகமில்லை. அதே சமயம், மென்பொருட் துறை மற்றும் தகவல் தொழிற்நுட்ப பன்னாட்டு சேவைத் துறை இந்தியாவில் பன்மடங்கு வளர்ச்சி அடைந்த நிலையில் விருப்பம் உள்ளவர்கள் , உலக மொழியான ஆங்கிலத்தை படிக்க தடை ஏற்படுத்தக் கூடாது. மாறாக கிராம மற்றும் சிறு நகரப் பகுதிகளிலும் தரமான ஆங்கிலம் கற்க வாய்ப்பு உருவாக்கி தர வேண்டும் என்பது என் கருத்து.

தன் சொந்த மக்களை கான்வென்ட் பள்ளிக்கு அனுப்பி விட்டு குப்பன் சுப்பன் பிள்ளைகள் தமிழ் மட்டும்தான் படிக்க வேண்டும் என்று இன்றைய தமிழ் "பிரியர்கள்" நினைப்பது எந்த விதத்தில் நியாயம்?

//இதைப் பற்றி நிறைய எழுதலாம். தனியே பதிவு போட வேண்டும்; (யாரும் படிக்க மாட்டார்கள். என்பது வேறு) ஆனால் ஒன்று::: இந்த விவாதங்கள் தாய் மொழி பயிற்றுவிக்கும் இடத்தில் வாழ கொடுத்து வைத்தவர்கள் மட்டுமே பயன் பெறுபவை. உங்களுக்கும் (மும்பையில் மகளை ஆரம்பக் கல்வி படிக்க வைக்க வேண்டிய நிலை) எனக்கும் ( அப்போது டில்லியில்) விவாதங்களுக்கான விஷயங்கள் மட்டுமே//

காலம் காலமாக, தமிழை உணர்வு பூர்வமான மொழியாக மட்டுமே தமிழர்கள் அணுகுவது தமிழின் துரதிர்ஷ்டம். அறிவில் சிறந்த தமிழர்கள் கூட, துறை சார்ந்த, தொழில் சார்ந்த, அறிவியல் சார்ந்த விஷயங்களை சமஸ்க்ரிதம், ஆங்கிலம் போன்ற மொழிகளில் உருவாக்கி விட்டு கதை, வீரம் காதல் மற்றும் பக்தி போன்ற உணர்வு பூர்வமான பொருட்களுக்கு மட்டுமே தமிழை நாடி வந்துள்ளனர். திருக்குறள் போன்ற வெகுசில இலக்கியங்கள் மட்டுமே விதி விலக்கு.

இப்போதும் கூட பல்துறையிலும் வெற்றி பெற்ற தமிழர்களில் பலர் பொழுது போக்கு அல்லது உணர்வு பூர்வமான விஷயங்களை மட்டுமே பதிந்து வருகின்றனர்.

இந்நிலை மாறி ஆங்கிலம், பிரெஞ்சு, லத்தீன் போன்று, வணிக மொழியாகவோ, தொழிற் நுட்ப மொழியாகவோ, கல்வி மொழியாகவோ, சட்ட மொழியாகவோ தமிழ் அறியப் படுமேயானால் நம்மை விட சந்தோசப் படுபவர் யார் இருக்க முடியும்?

இதற்காக பாடுபட கல்வியிலும் தொழில் அறிவிலும் சிறந்து விளங்கும் பதிவுலக நண்பர்கள் முன்வர வேண்டும் என்பதே எனது ஆசையாகும்.

நன்றி.
Maximum India said…
நன்றி தாமஸ் ரூபன்!
Maximum India said…
அன்புள்ள புகழினி!

//என் கதை.//

எந்த விதத்தில் சொல்கிறீர்கள் என்று புரியவில்லை. நீங்கள் இது போன்ற ஒரு பதிவை ஏற்கனவே உருவாக்கி இருக்கலாம். ஏன், இன்னும் பலருக்கும் இது போன்ற சிந்தனைகள் உருவாகி இருக்கலாம். ஆனால், எனக்கு நேற்றுத்தான் தோன்றியது. எனவே இந்த பதிவை பதிந்தேன்.

நன்றி
Maximum India said…
நன்றி கார்த்திக்!

//நாம எதுவும் செயமுடியாதுங்க
காலம் தான் பதில் சொல்லனும் //

ஏன் முடியாது? நிறைய செய்ய முடியும்? மேலே ஒரு பதிலில் சொன்னபடி தமிழை உணர்வு பூர்வமான மொழி என்ற நிலையிலிருந்து மாற்றுங்கள். தமிழன் அறிவு பூர்வமானவனாக மாறுவான்.

நன்றி.

Popular posts from this blog

வாண வேடிக்கையா? வெறும் புஸ்வாணமா?

பெரிதாக வெடிக்கப் போகிறது அல்லது வண்ண மயமான ஒளிச்சிதறல்கள் பூக்கப் போகின்றன என்றெல்லாம் பெரிதாக நாம் எதிர்பார்த்துக் கொண்டிருக்கும் போது, சில பட்டாசுகள் புஸ்வாணமாக போவதுமுண்டு. தீபாவளி தினத்தன்று நமக்கெல்லாம் சில சமயங்களில் ஏற்பட்டு விடும் இது போன்ற ஒரு அனுபவம் சென்ற வாரம் பங்குசந்தையிலும் ஏற்பட்டது. சென்ற வாரம் நம்மை ஏமாற்றிய புஸ்வாணங்களைப் பற்றி முதலில் பார்ப்போம். முதல் புஸ்வானம் - பாரதி ஏர்டெல் தென் ஆப்பிரிக்க தொலைபேசி நிறுவனமான எம்டிஎன்-னுடான இணைப்பு இல்லையென்றவுடன் முதலில் துள்ளிக் குதித்த பாரதி பங்கு, வெகு சீக்கிரத்திலேயே ஆடி அடங்கி விட்டது. எம்டிஎன்னுடன் இணையாததால் சில அபாயங்கள் நீங்குகின்றன என்று அந்த பங்கினை அதிக விலையில் வாங்கி வைத்து ஆசையுடன் காத்திருந்த பலருக்கு பாரதி ஒரு பெரிய புஸ்வாணமாகவே அமைந்தது. இரண்டாவது புஸ்வானம் - ரிலையன்ஸ் பத்து ஆண்டுகளுக்கு பின்னர் ரிலையன்ஸ் நிறுவனம் தனது பங்குதாரர்களுக்கு போனஸ் பங்கு கொடுப்பதாக அறிவித்தது. இந்தியாவின் 'நம்பர்-ஒன்' வணிகத் தாளான எகோநோமிக் டைம்ஸ் பத்திரிக்கை, தீபாவளி வாணவேடிக்கை ஆரம்பித்து விட்டதாக முதல் பக்கத்தில் தலைப்ப...

பொதுத் தேர்தலுக்காக ஐபிஎல் கிரிக்கெட் போட்டிகளை தள்ளி வைக்கலாமா?

உலகிலேயே அதிகம் பேர் வாக்களிக்கும் உரிமையுள்ள இந்தியப் பொதுத் தேர்தல் ஒரு பக்கம். உலக கிரிக்கெட் வரலாற்றிலேயே அதிக பரிசுத் தொகை மற்றும் வருமானம் கொண்ட ஐபிஎல் கிரிக்கெட் போட்டிகள் மறுபக்கம். இந்த இரண்டு முக்கிய நிகழ்வுகளும் ஒரே சமயத்தில் (ஏப்ரல் - மே 2009) ஒரு சேர அமைந்து விட பாதுகாப்பு காரணங்களுக்காக ஐபிஎல் தள்ளி வைக்கப் படுகின்ற சூழல் இப்போது ஏற்பட்டுள்ளது. இந்த நிலை பற்றி இங்கு விவாதிப்போம். முதலில் ஐபிஎல் போட்டிகள் தள்ளி வைக்கப் பட வேண்டும் என்று சொல்வோரின் வாதங்களைப் பார்க்கலாம். பாகிஸ்தானில் இலங்கை கிரிக்கெட் வீரர்கள் தாக்கப் பட்டதற்கு பின்னர், இந்த போட்டிகளுக்கான பாதுகாப்பை பலப் படுத்துவது மிக அவசியமான ஒன்று என ஆகி விட்டது. பல உளவுத் துறை அமைப்புகள், பாகிஸ்தான் தாக்குதல் சம்பவத்தைப் போல இந்தியாவிலும் நடைபெறலாம் என்று எச்சரித்துள்ள நிலையில், பாதுகாப்பு விஷயத்தினை எளிதாக எடுத்துக் கொள்ள முடியாது. ஐபிஎல் போட்டி சமயத்திலேயே இந்தியாவின் ஐந்து கட்ட பொதுத்தேர்தலும் அமைந்து விடுவதால் இரண்டு இடங்களிலும் பாதுகாப்பு அளிப்பது சிரமமான காரியமாகி விடும். மேலும், கிரிக்கெட் போட்டிகளுக்கான பாது...

இந்தியா தாக்குப் பிடிக்குமா?

இன்றைய உலகப் பொருளாதாரத் தேக்க நிலையில், இந்தியாவால் தாக்குப் பிடிக்க முடியுமா என்பது பற்றி பார்ப்போம். சமீபத்தில் வெளியிடப் பட்ட மத்திய புள்ளியல் (மத்திய அரசு) நிறுவனத்தின் மதிப்பீட்டின் படி இந்தியப் பொருளாதாரம் நடப்பு நிதியாண்டில் 7.1 சதவீதம் வளர்ச்சியுறும் என்று தெரிகிறது. இது சரியாக இருக்கும் பட்சத்தில் உலகிலேயே இரண்டாவதாக வேகமாக வளர்ச்சியுறும் நாடு இந்தியாவாகத்தான் இருக்கும் (சீனா முதலாவது). சென்ற ஆண்டில் ஒன்பது சதவீதம் வளர்ச்சி பெற்றிருந்த இந்தியப் பொருளாதாரம் செப்டம்பர் 2008 வரையிலான முதல் அரையாண்டில் 7.80% வளர்ச்சிப் பெற்றிருந்தது. பொதுவாகவே பண்டிகைக் காலமாக கருதப் படுகிற இரண்டாவது அரையாண்டே தொழிற் துறையில் அதிக வளர்ச்சியைக் காட்டும் என்றாலும் இந்த முறை இந்தியத் தொழில் துறை பெரும் தேக்க நிலையில் இருந்து வந்திருக்கிறது என்பது கவனிக்கத் தக்கது. இந்திய தொழிற் வளர்ச்சி கடந்த இரு மாதங்களாக மிகவும் குறைந்து காணப் படுவதாலும் ஏற்றுமதியோ இறங்குமுகத்தில் இருப்பதாலும் இந்திய அரசாங்கம், மார்ச் 2009 வரையிலான நிதி ஆண்டின் இரண்டாவது அரையாண்டில் நமது பொருளாதாரம் குறைந்த வளர்ச்சியே (6.30%) இரு...