Skip to main content

எல்லை தாண்டுமா?

எதிர்பார்த்ததை விட மோசமாக அமெரிக்க பொருளாதாரம் வீழ்ந்திருப்பதாக முந்தைய வார இறுதியில் வெளியிடப் பட்ட தகவலின் அடிப்படையில் நமது சந்தைகள் சென்ற வாரத்தை ஒரு பெரிய சரிவுடனேயே துவங்கின.

பெரும்பாலான காலாண்டு நிதி அறிக்கைகள் வெளி வந்து விட்ட நிலையில் சந்தையின் போக்கை நிர்ணயிக்கக் கூடிய புதிய காரணிகள் பெருமளவில் இல்லாத காரணத்தாலும், குறுகிய கால நோக்கில் சந்தையின் போக்கு குறித்து வணிகர்களிடையே நிலவி வரும் சந்தேகங்களினாலும் சென்ற வாரம் நமது பங்கு சந்தையில் வர்த்தகம் மிகவும் குறைந்தே காணப் பட்டது.

முந்தைய வாரத்தில் ஏற்பட்ட முன்னேற்றத்தின் காரணமாக நன்கு உயர்ந்திருந்த பங்குகள் கடந்த வாரத்தில் லாப நோக்குடன் விற்பனை செய்யப் பட்டன. வெளிநாட்டு நிறுவனங்கள் இந்திய சந்தையில் தமது பங்குகளை (குறைந்த அளவில்) விற்றன. இனி, இந்திய தலைமை வங்கி வட்டி வீதங்களை குறைக்காது என்ற சந்தை யூகங்களின் அடிப்படையில் ரியல் எஸ்டேட், வங்கி, வாகனம், இயந்திர உற்பத்தி துறைகளை சார்ந்த பங்குகள் வீழ்ச்சியை சந்தித்தன.டி.எல்.எப் நிறுவனத்தின் மோசமான காலாண்டு நிதி அறிக்கையும், ரியல் எஸ்டேட் பங்குகளின் வீழ்ச்சிக்கு ஒரு முக்கிய காரணம். சிமெண்ட் துறை சார்ந்த நிறுவன பங்குகள் முன்னேற்றத்தை சந்தித்தன. கிருஷ்ணா-கோதாவரி எரிவாயு விவகாரத்தில் சாதகமான இடைக் கால தீர்ப்பைப் பெற்றதால், சென்செக்ஸ் மற்றும் நிபிட்டி ஆகிய குறியீடுகளின் முக்கிய பங்கான ரிலையன்ஸ் ஏற்றத்தை கண்டது. மொத்தத்தில் நமது சந்தை சென்ற வாரத்தில் பெரும் ஏற்ற இறக்கங்களையே சந்தித்து வந்தது. இறுதியாக, முக்கிய குறியீடுகளான நிபிட்டி மற்றும் சென்செக்ஸ் சிறிய அளவில் சரிவைச் சந்தித்தன. நிபிட்டி 2750 அளவில் நல்ல அரணைக் கொண்டிருந்தது.

வருகிற வாரம், ஒபாமா அவர்களால் அறிவிக்கப் படவிருக்கும் அமெரிக்க பொருளாதார மீட்டெடுப்பு திட்டம் சந்தைகளால் உன்னிப்பாக கவனிக்கப் படும். ஏற்கனவே இந்த திட்டத்தின் மீது நம்பிக்கை வைத்துள்ள உலக சந்தைகள் கடந்த வெள்ளிக் கிழமை நல்ல முன்னேற்றத்தை கண்டது குறிப்பிடத்தக்கது. மேலும், கடந்த வாரத்தில் நமது நாட்டில் பணவீக்கம் குறைந்திருப்பதும், மைய வங்கியின் தலைவரின் அறிக்கையும், வட்டி வீதங்கள் குறைக்கப் படலாம் என்ற மீண்டும் ஒரு புதிய நம்பிக்கையை சந்தை வர்த்தகர்களுக்கு தந்துள்ளன. மேலும் இந்திய மத்திய அரசால் வரும் வாரத்தில் அறிவிக்கப் படவிருக்கும் இடைக் கால நிதியறிக்கையில் இந்திய பொருளாதாரத்தை மீட்டெடுக்க புதிய திட்டங்கள் இருக்கும் என்ற நம்பிக்கையும் வருகின்ற வாரத்தில் சந்தையை ஏற்ற நிலையில் வைக்க உதவும்.

வெகு காலமாகவே, ஒரு குறுகிய எல்லைகளுக்குள்ளேயே (2700 -2900) தடுமாறி வரும் நமது சந்தைகள் இந்த வாரம் மேல் எதிர்ப்பான 2900 அளவை தாண்டும் என்று எதிர்பார்க்கலாம். அமெரிக்க பொருளாதார திட்டம் மற்றும் இந்திய (இடைக்கால) நிதி நிலை அறிக்கை ஆகியவை சந்தைகளுக்கு திருப்தி அளிக்கும் பட்சத்தில் நிபிட்டி 3050 (3200) நோக்கி பயணம் செய்யும் என்று எதிர்பார்க்கலாம். அதே சமயத்தில் சந்தையில் ஏற்ற இறக்கங்கள் மிகுந்தே காணப் படும். வர்த்தகர்கள் 2750 அளவை ஸ்டாப் லாஸ் ஆக வைத்துக் கொண்டு நிபிட்டி குறியீடு மற்றும் பெரிய பங்குகளை வாங்கலாம்.

தொடர்ந்து இரு வாரங்களாக "முன்னேறி வரும் நாடுகளின் சந்தைகள்" முன்னேற்றத்தை கண்டு வருவதை தொடர்ந்து, நாணய சந்தையில் டாலர் விலை குறையும் என்று எதிர்பார்க்கலாம். அமெரிக்க பொருளாதார மீட்டெடுப்பு திட்டத்தின் அடிப்படையில் கட்சா எண்ணெய் மற்றும் அடிப்படை உலோகங்களின் விலை உயர்வு ஏற்பட வாய்ப்பு உள்ளது. அதே சமயம், பங்கு சந்தைகள் உயரும் பட்சத்தில் தங்கத்தின் விலை குறையவும் வாய்ப்பு உள்ளது.

வரும் வாரம் சிறப்பாக அமைய வாழ்த்துக்கள்.

நன்றி.

Comments

//கட்சா எண்ணெய் மற்றும் அடிப்படை உலோகங்களின் விலை உயர்வு ஏற்பட வாய்ப்பு உள்ளது.//

மிக்க நன்றி!
அடிப்படை உலோகங்கள் ஐந்து வருடத்திற்கு முந்தைய விலையில் இருந்தாலும் முதலீடு செய்ய சிறு தயக்கம் இருந்தது. இப்போது காப்பர் விலையேற்றம் புது நம்பிக்கையை தருகிறது
Maximum India said…
அன்புள்ள வால்பையன்

பின்னூட்டத்திற்கு நன்றி

//அடிப்படை உலோகங்கள் ஐந்து வருடத்திற்கு முந்தைய விலையில் இருந்தாலும் முதலீடு செய்ய சிறு தயக்கம் இருந்தது. இப்போது காப்பர் விலையேற்றம் புது நம்பிக்கையை தருகிறது//

குறுகிய கால நோக்கில் அடிப்படை உலோககங்களின் விலை ஏறும் (அமெரிக்க பொருளாதார மீட்டெடுப்பு முயற்சியின் அடிப்படையில்) என்றாலும், நீண்ட கால நோக்கில் சற்று எச்சரிக்கையாக இருப்பது நல்லது. (பங்கு சந்தைகளுக்கும் இதே நிலைதான்). பொதுவாகவே சரிவை சந்திக்கும் ஒரு பெரிய பொருளாதாரத்தை சில அரசு நடவடிக்கைகள் மூலம் மட்டுமே உயரச் செய்ய முடியாது. அரசு அடிக்கும் நோட்டுக்களின் எண்ணிக்கை அதிகமாவது அதன் பொருளாதாரத்திற்கு நல்லது அல்ல.

நன்றி.
Maximum India said…
Dear Superlinks

Thanks for the visit.

Popular posts from this blog

வாண வேடிக்கையா? வெறும் புஸ்வாணமா?

பெரிதாக வெடிக்கப் போகிறது அல்லது வண்ண மயமான ஒளிச்சிதறல்கள் பூக்கப் போகின்றன என்றெல்லாம் பெரிதாக நாம் எதிர்பார்த்துக் கொண்டிருக்கும் போது, சில பட்டாசுகள் புஸ்வாணமாக போவதுமுண்டு. தீபாவளி தினத்தன்று நமக்கெல்லாம் சில சமயங்களில் ஏற்பட்டு விடும் இது போன்ற ஒரு அனுபவம் சென்ற வாரம் பங்குசந்தையிலும் ஏற்பட்டது. சென்ற வாரம் நம்மை ஏமாற்றிய புஸ்வாணங்களைப் பற்றி முதலில் பார்ப்போம். முதல் புஸ்வானம் - பாரதி ஏர்டெல் தென் ஆப்பிரிக்க தொலைபேசி நிறுவனமான எம்டிஎன்-னுடான இணைப்பு இல்லையென்றவுடன் முதலில் துள்ளிக் குதித்த பாரதி பங்கு, வெகு சீக்கிரத்திலேயே ஆடி அடங்கி விட்டது. எம்டிஎன்னுடன் இணையாததால் சில அபாயங்கள் நீங்குகின்றன என்று அந்த பங்கினை அதிக விலையில் வாங்கி வைத்து ஆசையுடன் காத்திருந்த பலருக்கு பாரதி ஒரு பெரிய புஸ்வாணமாகவே அமைந்தது. இரண்டாவது புஸ்வானம் - ரிலையன்ஸ் பத்து ஆண்டுகளுக்கு பின்னர் ரிலையன்ஸ் நிறுவனம் தனது பங்குதாரர்களுக்கு போனஸ் பங்கு கொடுப்பதாக அறிவித்தது. இந்தியாவின் 'நம்பர்-ஒன்' வணிகத் தாளான எகோநோமிக் டைம்ஸ் பத்திரிக்கை, தீபாவளி வாணவேடிக்கை ஆரம்பித்து விட்டதாக முதல் பக்கத்தில் தலைப்ப...

பொதுத் தேர்தலுக்காக ஐபிஎல் கிரிக்கெட் போட்டிகளை தள்ளி வைக்கலாமா?

உலகிலேயே அதிகம் பேர் வாக்களிக்கும் உரிமையுள்ள இந்தியப் பொதுத் தேர்தல் ஒரு பக்கம். உலக கிரிக்கெட் வரலாற்றிலேயே அதிக பரிசுத் தொகை மற்றும் வருமானம் கொண்ட ஐபிஎல் கிரிக்கெட் போட்டிகள் மறுபக்கம். இந்த இரண்டு முக்கிய நிகழ்வுகளும் ஒரே சமயத்தில் (ஏப்ரல் - மே 2009) ஒரு சேர அமைந்து விட பாதுகாப்பு காரணங்களுக்காக ஐபிஎல் தள்ளி வைக்கப் படுகின்ற சூழல் இப்போது ஏற்பட்டுள்ளது. இந்த நிலை பற்றி இங்கு விவாதிப்போம். முதலில் ஐபிஎல் போட்டிகள் தள்ளி வைக்கப் பட வேண்டும் என்று சொல்வோரின் வாதங்களைப் பார்க்கலாம். பாகிஸ்தானில் இலங்கை கிரிக்கெட் வீரர்கள் தாக்கப் பட்டதற்கு பின்னர், இந்த போட்டிகளுக்கான பாதுகாப்பை பலப் படுத்துவது மிக அவசியமான ஒன்று என ஆகி விட்டது. பல உளவுத் துறை அமைப்புகள், பாகிஸ்தான் தாக்குதல் சம்பவத்தைப் போல இந்தியாவிலும் நடைபெறலாம் என்று எச்சரித்துள்ள நிலையில், பாதுகாப்பு விஷயத்தினை எளிதாக எடுத்துக் கொள்ள முடியாது. ஐபிஎல் போட்டி சமயத்திலேயே இந்தியாவின் ஐந்து கட்ட பொதுத்தேர்தலும் அமைந்து விடுவதால் இரண்டு இடங்களிலும் பாதுகாப்பு அளிப்பது சிரமமான காரியமாகி விடும். மேலும், கிரிக்கெட் போட்டிகளுக்கான பாது...

இந்தியா தாக்குப் பிடிக்குமா?

இன்றைய உலகப் பொருளாதாரத் தேக்க நிலையில், இந்தியாவால் தாக்குப் பிடிக்க முடியுமா என்பது பற்றி பார்ப்போம். சமீபத்தில் வெளியிடப் பட்ட மத்திய புள்ளியல் (மத்திய அரசு) நிறுவனத்தின் மதிப்பீட்டின் படி இந்தியப் பொருளாதாரம் நடப்பு நிதியாண்டில் 7.1 சதவீதம் வளர்ச்சியுறும் என்று தெரிகிறது. இது சரியாக இருக்கும் பட்சத்தில் உலகிலேயே இரண்டாவதாக வேகமாக வளர்ச்சியுறும் நாடு இந்தியாவாகத்தான் இருக்கும் (சீனா முதலாவது). சென்ற ஆண்டில் ஒன்பது சதவீதம் வளர்ச்சி பெற்றிருந்த இந்தியப் பொருளாதாரம் செப்டம்பர் 2008 வரையிலான முதல் அரையாண்டில் 7.80% வளர்ச்சிப் பெற்றிருந்தது. பொதுவாகவே பண்டிகைக் காலமாக கருதப் படுகிற இரண்டாவது அரையாண்டே தொழிற் துறையில் அதிக வளர்ச்சியைக் காட்டும் என்றாலும் இந்த முறை இந்தியத் தொழில் துறை பெரும் தேக்க நிலையில் இருந்து வந்திருக்கிறது என்பது கவனிக்கத் தக்கது. இந்திய தொழிற் வளர்ச்சி கடந்த இரு மாதங்களாக மிகவும் குறைந்து காணப் படுவதாலும் ஏற்றுமதியோ இறங்குமுகத்தில் இருப்பதாலும் இந்திய அரசாங்கம், மார்ச் 2009 வரையிலான நிதி ஆண்டின் இரண்டாவது அரையாண்டில் நமது பொருளாதாரம் குறைந்த வளர்ச்சியே (6.30%) இரு...